தமிழ்நாடு சட்டமன்ற நூற்றாண்டு விழா மற்றும்  முன்னாள் முதல்வர் கருணாநிதியின் படத்திறப்பு விழாவில்  குடியரசுத் தலைவர் ராம்நாத் கோவிந்த் அவர்கள்  2-8-2021 அன்று கலந்துகொண்டு   முன்னாள் முதல்வர் கருணாநிதி அவர்களின் திருவுருவ படத்தை தலைமைச் செயலகத்தில்  திறந்து வைத்தார். தமிழக சட்டமன்ற வரலாறு: (நன்றி : விகடன்) 

தற்போதுள்ள தமிழ்நாட்டின் சட்டப்பேரவை, முன்பிருந்த சென்னை மாகாணத்தின் நீட்சியாகவே கருதப்படுகிறது. 1919-ம் ஆண்டு மாண்டேகு செம்ஸ்போர்டு சீர்திருத்தங்களின் அடிப்படையில் சென்னை மாகாண மன்றத்துக்கு 1920-ம் ஆண்டு நவம்பர் 30-ம் தேதி பொதுத்தேர்தல் நடைபெற்றது. அதில், நீதிக்கட்சி பெரும்பான்மை இடங்களைக் கைப்பற்றி, சுப்பராயலு ரெட்டியார் தலைமையில் தேர்ந்தெடுக்கப்பட்ட முதல் அமைச்சரவை பொறுப்பேற்றது. 1921-ம் ஆண்டு, ஜனவரி 12-ம் தேதி கன்னாட் கோமகனால் முதல் மாகாண சுயாட்சி சட்டமன்றம் தொடங்கிவைக்கப்பட்டது. 1919-ம் ஆண்டு மாண்டேகு செம்ஸ்போர்டு சீர்திருத்தங்களின் அடிப்படையில் , இந்தியர்களுக்கு ஆட்சி நிர்வாகத்தில் பகுதிவாரியாக பொறுப்பாட்சிகள் வழங்கப்பட்டன. அதன் அடிப்படையில்தான் 1921-ல் சென்னை உள்ளிட்ட ஒன்பது மாகாணங்களில் புதிய சட்டமன்றங்கள் தனித் தனியாக உருவாக்கப்பட்டன. தற்போதைய தமிழக சட்டமன்றத்தின் முதல் கூட்டம் சென்னை புனித ஜார்ஜ் கோட்டையில் 1921-ம் ஆண்டு, ஜனவரி 9-ம் தேதி நடைபெற்றது. தற்போதைய தமிழ்நாட்டு சட்டமன்றத்தின் பதவிக்காலம் ஐந்து ஆண்டுகளாக இருக்கிறது. ஆனால், 1921-ல் சென்னை மாகாணத்தின் சட்டமன்ற பதவிக்காலம் மூன்று ஆண்டுகள் மட்டுமே. 1919 சீர்திருத்தத்தின்படி சென்னையில் அமைக்கப்பட்ட சட்டமன்றத்தில் 98 தேர்ந்தெடுக்கப்பட்ட உறுப்பினர்களும், 25 நியமன உறுப்பினர்களும் இருந்தனர். சென்னை மாகாண நிர்வாகத்தின் அதிகாரப் பொறுப்புகளை தன்வசம் வைத்திருந்த ஆளுநர், சட்டமன்றத்தின் பதவிக்காலம் முடிவதற்கு முன்பாகவே கலைக்கவும், பதவிக்காலத்தை நீட்டிக்கவும் எல்லா அதிகாரங்களையும் பெற்றிருந்தார்.